ग्लेनडेल, एरिजोना— विशाल स्टेट फार्म स्टेडियम मानिसहरूले भरिएको थियो। सेप्टेम्बर २१ को त्यो साँझ, प्रत्येकअनुहारमा दुःख, स्मृति र श्रद्धा मिसिएको थियो। कार्यक्रमको केन्द्रमा भने एउटी नारी थिइन्— एरिका कर्क।

उनका श्रीमान्, अमेरिकी युवा आन्दोलनका एक चर्चित नाम चार्ली कर्क, ११ दिनअघि युटा भ्याली युनिभर्सिटीमाभएको गोलीकाण्डमा मारिएका थिए। अझै आँसु सुक्न नपाउँदै एरिकाले मञ्च सम्हालिन्।

उनले भाषण सुरु गर्नुअघि आफ्ना श्रीमान्को मनपर्ने पद उद्धृत गरिन्—

“प्रभु, म यहाँ छु, मलाई पठाऊ।” (यशैया ६:८)

त्यसपछि उनले सबैतिर शान्त मौन छर्दै भनिन्,

“मेरा श्रीमान् चार्ली, उहाँले त्यस्ता युवाहरूलाई बचाउन चाहन्थे, जसले अन्ततः उहाँको जीवन लियो। हाम्रो प्रभुलेक्रूसमा भन्नुभयो— हे पिता, तिनीहरूले के गर्दैछन् थाहा छैन, तिनीहरूलाई क्षमा गर। त्यसैले म पनि क्षमा गर्छु।”

एरिकाको स्वर काँपिरहेको थियो, तर शब्दहरू अडिग थिए। उनले हत्यारा २२ वर्षीय टायलर रोबिन्सनलाई क्षमागर्ने घोषणा गरिन्।

“घृणाको उत्तर घृणा होइन,” उनले थपिन्। “सुसमाचारले हामीलाई सिकाउँछ— प्रेम, सधैं प्रेम। शत्रुप्रति पनि, सताउनेहरू प्रति पनि।”

त्यो क्षणले स्टेडियमको वातावरणलाई नै रूपान्तरण गरिदियो।

परिवार, प्रेम र अधूरो सपना

चार्ली र एरिकाको विवाह निरन्तर यात्राबीच पनि मजबुत थियो। उनीहरूले २०२२ मा छोरी र २०२४ मा छोरापाएका थिए। एरिकाले आज ती सन्तानहरूको भविष्यलाई बोकेर नयाँ जिम्मेवारी पनि उठाएकी छन्— टर्निङप्वाइन्ट यूएसए (Turning Point USA) को सीईओको रूपमा।

“चार्लीसँग बिताएको समय छोटो थियो तर गहिरो,” उनले भनिन्, “हामीले परिवारलाई प्राथमिकता दिन सधैंसिकेका थियौं।”

ट्रम्पको फरक दृष्टिकोण

एरिकाको भावुक भाषणपछि मञ्चमा चढे राष्ट्रपति डोनाल्ड ट्रम्प।

उनले चार्लीलाई “उद्देश्यप्रति समर्पित मिशनरी” भनेर स्मरण गरे। तर जब कुरा क्षमाको आयो, ट्रम्पले ठाडै फरकमत राखे।

“चार्लीले आफ्नो शत्रुलाई प्रेम गर्नुहुन्नथ्यो। उहाँले तिनको भलो चाहनुहुन्थ्यो,” ट्रम्पले भने। “तर म त्यहाँ असहमतछु। म आफ्ना शत्रुलाई घृणा गर्छु। म तिनको भलो चाहन्न।”

स्टेडियम पुनः मौन भयो। एरिकाको क्षमाले उचालेको आध्यात्मिक वातावरणमा ट्रम्पका शब्दहरू एक किसिमकोठोक्किनेजस्तो लाग्यो। तर उनले हाँसो मिसाउँदै थपे,

“सायद एरिकाले र तपाईंहरूले मलाई सिकाउनुहोला। तर चार्ली माथिबाट मलाई हेर्दै रिसाइरहेका छन्।”

एरिका र ट्रम्पबीचको भिन्नता

यो दिनले दुई फरक दृष्टिकोणलाई एकै मञ्चमा देखायो—

• एरिकाको दृष्टि : “घृणाको उत्तर प्रेम हो।”
• ट्रम्पको दृष्टि : “शत्रु भनेको शत्रु नै हो।”

तर दुवै सन्देशले चार्लीको नामलाई एउटा ठूलो बहसको केन्द्रमा पुर्‍याइदियो— घृणाको सामना कसरी गर्ने?

चार्लीको विरासत

चार्ली कर्क अब जीवित छैनन्, तर उनको सपना अझ बाँकी छ। हजारौं युवाहरूलाई प्रेरित गर्ने उनको आवाज मन्दभए पनि, उनकी पत्नी एरिकाको आँशु र क्षमामा चार्लीकै आत्मा बोलिरहेको जस्तो लाग्छ।

चार्लीले एकपटक भनेका थिए,

“हामीलाई हराउन सक्ने शक्ति छैन, यदि हामी प्रेममा अडिग छौं भने।”

आज, एरिकाको क्षमामा त्यो वाक्य प्रत्यक्ष अनुभव गर्न सकिन्छ।बिशु  गुरुङ

  द न्युवर्क टाइम्स