काठमान्डौ — अमेरिकी राष्ट्रपति डोनाल्ड ट्रम्पले नाइजेरियामा क्रिश्चियनहरुलाई हत्त्याउने घटनाहरु भइरहेकाले त्यसको सामना गर्न तयार हुन रक्षा मन्त्रालयलाई निर्देशन दिँदै तीव्र सैन्य कारबाहीको धम्की दिएका छन्। उनले आफ्नो सामाजिक सञ्जाल ट्रुथ सोसलमा शनिबार प्रकाशित पोस्टमा, यदि नाइजेरियाले क्रिश्चियनको सुरक्षित संरक्षण गर्न असफल रह्यो भने शनै–शनै कठोर कदम चालिने उल्लेख गरेका छन्।

ट्रम्पले नाइजेरियालाई दिइएको सबै प्रकारको सहयोग र सहायता तुरुन्त रोकिने चेतावनीसमेत दिएका छन्। नाइजेरियामा करिब २०० वटा जातीय समूह रहेका छन् र त्यहाँ क्रिश्चियन, इस्लाम र परम्परागत धर्मावलम्बीहरू बसोबास गर्छन्। बोको हराम र आइएस–पश्चिम अफ्रिका प्रान्तजस्ता इस्लामिक आतङ्कवादी समूहले पनि क्रिश्चियनमाथि हिंसा र हत्याका घटना गरिरहँदा सरकारले तिनलाई नियन्त्रण गर्न नसकेको ट्रम्पको आरोप छ।

उनले सामाजिक सञ्जालमा लेख्दै भने, “यदि हामीले आक्रमण गर्‍यौं भने, यो छिटो, क्रूर र निर्णायक हुनेछ — ठीक त्यसरी जसरी आतङ्ककारीहरूले हाम्रा प्रिय क्रिश्चियनहरूलाई आक्रमण गर्छन्।” ट्रम्पले नाइजेरियालाई ‘कलंकित’ राष्ट्रको संज्ञा दिएका छन्।

यो चेतावनी त्यतिखेर आएको हो जब अमेरिकाले धार्मिक स्वतन्त्रताको उल्लंघन गर्ने देशहरूको सूचीमा नाइजेरियालाई पुनः समावेश गरेको खबर सार्वजनिक भएको थियो। सो सूचीमा चिन, म्यानमार, उत्तर कोरिया, रुस र पाकिस्तान जस्ता देशहरूको पनि नाम रहेको समाचार संस्था रोयटर्सले जनाएको थियो। अमेरिकी रक्षा मन्त्री पिट हेगसेथले पनि आफ्नो मन्त्रालयले सम्भावित कारबाहीका लागि तयारी गरिरहेको बताएका छन्।

ट्रम्पले ट्वीट/पोस्टमा थपे — “या त नाइजेरियाली सरकारले आफ्नो क्रिश्चियनहरूलाई सुरक्षित राखोस्, या त ती भयानक आतङ्कवादीहरूलाई हामीले नियन्त्रण गर्नेछौं।”