टिकट काउन्टरमा लाइन, अनलाइन बुकिङमा सर्भर नै स्लो । शुक्रबार ‘दृश्यम ३’ को पहिलो शो सुरु हुनुअघि नै भारतका सिनेमा हलले हाउसफुलको बोर्ड झुन्ड्याइसकेका थिए ।
साँझ ६ बजेसम्म फिल्मले भारतमा ४६ करोड ३५ लाख भारु खुद कमाइसकेको छ । अजय देवगनको करिअरमै यो सबैभन्दा ठुलो ओपनिङमध्ये एक हो ।
प्रदर्शनअघि नै ५० करोड
सेप्टेम्बर २७ मा अग्रिम बुकिङ खुल्दा नै दर्शकले ठूलो उत्साह देखाएका थिए । प्रदर्शनको दिन नआउँदै करिब १३ लाख टिकट बिक्री भयो, जसबाट ५० करोड भारुभन्दा बढी जम्मा भयो । बिहानका शोमा देशभर ४० प्रतिशत हल भरिएको थियो, केही दोस्रो र तेस्रो तहका सहरमा त्योभन्दा पनि बढी ।
विश्लेषकको हिसाब बिग्रियो
व्यापार विश्लेषकले पहिलो दिन २५ देखि ३० करोड भारु कमाउने अनुमान गरेका थिए । बलियो अग्रिम बुकिङ देखेपछि उनीहरूले आफ्नै हिसाब बढाउनुपर्यो । अन्ततः फिल्मले अनुमानलाई निकै पछाडि छोड्यो ।
पठानको रेकर्ड पनि तल
बुक माइ शोमा शुक्रबार दिउँसो फिल्मका टिकट प्रतिघण्टा ७० हजारको दरले बिके । सन् २०२३ मा ‘पठान’ले बनाएको ६८ हजारको कीर्तिमान यसले पार गर्यो ।
यस वर्षको दोस्रो ठुलो ओपनिङ
यो वर्षका अन्य ठुला फिल्मको पहिलो दिनको कमाइसँग तुलना गर्दा ‘दृश्यम ३’ धेरै अगाडि देखिन्छ:
-बोर्डर २: ३० करोड
-मिर्जापुर द फिल्म: २५ करोड
-अवरापन २: २२ करोड
-सुल्तान (सन् २०१६): ३६ करोड
यी सबै फिल्मलाई ‘दृश्यम ३’ ले उछिनेको छ । यो वर्ष यसभन्दा ठुलो ओपनिङ ‘धुरन्धर द रिभेन्ज’ले मात्र पाएको छ ।
अब प्रश्न एउटै छ: पहिलो दिनको यो उत्साह सप्ताहन्तसम्म टिक्छ कि टिक्दैन ?
