काठमाडौं । विश्वप्रसिद्ध प्रविधि कम्पनी माइक्रोसफ्टका विभिन्न डिजिटल सेवामा बिहीबार व्यापक प्राविधिक समस्या देखिएको छ। यसका कारण आउटलुक (Outlook), माइक्रोसफ्ट टिम्स (Microsoft Teams), कोपाइलट (Copilot) तथा माइक्रोसफ्ट ३६५ (Microsoft 365) प्रयोग गर्ने विश्वभरका लाखौँ प्रयोगकर्ता प्रभावित भएका छन्।

आउटेज ट्र्याक गर्ने वेबसाइट डाउनडिटेक्टरका अनुसार बिहीबार अमेरिकी पूर्वी समयअनुसार दिउँसो १ बजेपछि आउटलुक सेवामा समस्या आएको भन्दै करिब १ लाख ३० हजार प्रयोगकर्ताले गुनासो गरेका थिए।

प्रभावित प्रयोगकर्ताहरूले इमेल पठाउन तथा प्राप्त गर्न नसकेको, इनबक्स खोल्न समस्या भएको र इमेल सेवा पूर्ण रूपमा लोड हुन नसकेको बताएका छन्। त्यस्तै, माइक्रोसफ्टको कार्यालयमा प्रयोग हुने सञ्चार एप टिम्स, एआई सहायक कोपाइलट र अन्य माइक्रोसफ्ट ३६५ सेवामा समेत समस्या देखिएको थियो।

यस प्राविधिक अवरोधको असर एसियाका विभिन्न देशमा पनि परेको छ। शुक्रबार बिहानसम्म जापानलगायत एसियाली मुलुकका प्रयोगकर्ताहरूले माइक्रोसफ्टका सेवामा समस्या भोगिरहेको बताएका थिए।

जापानका उपमुख्य मन्त्रिपरिषद् सचिव मासानाओ ओजाकीले शुक्रबार माइक्रोसफ्टको सेवामा आएको समस्याले सरकारी सूचना प्रविधि पूर्वाधारसमेत प्रभावित भएको जानकारी दिएका छन्। उनले घटनाक्रमलाई नजिकबाट निगरानी गरिरहेको बताएका छन्।

यसैबीच, माइक्रोसफ्टले सामाजिक सञ्जालमार्फत विभिन्न सूचना जारी गर्दै समस्याबारे अनुसन्धान भइरहेको जनाएको छ। कम्पनीका अनुसार यसको केही पूर्वाधारमा असामान्य रूपमा अत्यधिक लोड बढेका कारण कनेक्टिभिटीमा समस्या आएको हो।

कम्पनीले स्वचालित स्वास्थ्य परीक्षणका क्रममा केही सर्भरहरू असफल भएको र ती सर्भरलाई पुनः सञ्चालनमा ल्याउन प्रयोग गरिएका वैकल्पिक उपायले तत्काल प्रभावकारी काम नगरेको जनाएको छ।

माइक्रोसफ्ट ३६५ स्टाटस अकाउन्टले सामाजिक सञ्जाल एक्समा जारी गरेको सूचनामा समस्याको असर कम गर्न उपलब्ध सबै उपायहरू तीव्र रूपमा अपनाइरहेको उल्लेख गरेको छ।

यसअघि कम्पनीले उत्तर अमेरिकामा माइक्रोसफ्ट टिम्स सेवा सफलतापूर्वक पुनः सञ्चालनमा ल्याइएको जनाएको थियो। यद्यपि, केही प्रयोगकर्ताले त्यसपछि पनि सेवा प्रयोगमा समस्या भइरहेको गुनासो गरेका थिए।

विश्वभरका कार्यालय, सरकारी निकाय, सञ्चार संस्था तथा व्यवसायले दैनिक कामकाजका लागि माइक्रोसफ्टका सेवामा निर्भर रहने भएकाले यस घटनाले डिजिटल पूर्वाधारको विश्वसनीयता र वैकल्पिक सञ्चार प्रणालीको आवश्यकतामाथि समेत प्रश्न उठाएको छ।

News Source- ABC New York